Ra’iisul Wasaaraha xukuumadda federaalka Soomaaliya, Xasan Cali Khayre, ayaa maanta guddoomiyay shirka golaha wasiirrada dowlad gobaleedka Koonfur Galbeed oo looga hadlay daddar-gelinta shaqooyinta tubaha Koonfur Galbeed.
Ra’iisal wasaare Xasan Cali Khayre ayaa sheegay in ku shaqeynta tubuhu ay qayb ka noqoneyso dejinta nidaam lagu shaqeeyo Mustaqbalka, loona baahanyahay in wadajir looga howl galo si loo fududeeyo hir-gelinta halbeegyada tubaha ee muhiimka ah u adeegidda bulshada, gaaridda hadafyada waaweyn ee qarannimo iyo hir-gelinta himilooyinka bulshadu ay leeyihiin.
Xasan Cali Khayre ayaa sidoo kale golaha wasiirrada u sheegay in socdaalkiisa ay qayb ka tahay dhageysiga bulshada si loo helo fikirkooda horumarineed, waxaa uuna xusay in ay muhiim tahay wada shaqeynta dowladda dhexe iyo dowlad gobaleedyada si loo hirgeliyo qorshayaasha horumarineed ee bulshada lagu gaarsiinayo amni hagaagsan, caafimaada iyo waxbarashada tayo sare leh oo lacag la’aan ah.
Ra’iisal wasaaraha ayaa madaxweynaha Koonfur Galbeed ku ammaanay wax qabadka ballaaran ee maamulkiisu qabtay intii uu xilka hayay iyo sida uu tusaalaha wanaagsan ugu yahay wada-shaqeynta dowladda dhexe iyo dowlad gobaleedyada dalka.
Dhanka kale, Ra’iisul Wasaaraha xukuumadda federaalka Soomaaliya, ayaa sidoo kale kormeer ku tagay qaar kamid ah wasaaradaha iyo Madaxtooyada Dowlad gobaleedaka Koonfur Galbeed, waxa uuna howl wadeennada wasaaraha ka xog wareystay hannaanka ay u wadaan shaqada loogu adeegayo shacabka Koonfur Galbeed.
